Halló!

Hæ hæ!

Til hamingju með afmælið elsku mamma!

Það eru svo mörg nóvember-börn! Valur 1., Sigrún 5., austurrísk vinkona mín 7. og nú mamma 10.!!!  Leiðinlegt að missa af öllum þessum kökum.... ég meina afmælum sko hoho.

Í dag var svolítið skrýtinn dagur. Ég ákvað að fara á tattú/götunar stofu og fá mér fleiri göt í eyrnarsnepilinn. Það var sársaukafullt... og frekar ógeðfellt hljóð sem fylgdi þegar nálin var sett í gegn. En stofan lúkkaði vel, nálarnar nýjar og allt sterílerað!

Annars er mikið að gera í skólanum. Tvær skýrslur sem ég þarf að skila á mánudag. Svo var kennarinn í vatnavistfræði að stinga upp á því að færa janúarprófið til desembers, en þá gæti ég þess vegna verið allan janúar heima á Íslandi. Sjáum til hvað verður, vona að ákvörðunin verði tekin fljótlega.

Mér líst ágætlega á nýju fögin enn sem komið er. Vona að þau verði jafnskemmtileg út önnina, en það verður mjög mikil verkefnavinna þar sem að þessir tveir kúrsar eru próflausir.

Annars er lítið að frétta.. nema að ég fór á H.C. Andersen safnið um daginn. Þegar ég kom á safnið var ég með stjörnur í augunum við að sjá allt þetta áhugaverða dót og dúkkur úr ævintýrunum hans, en þegar ég ætlaði að borga sagði konan að þessi deild væri einungis fyrir krakka. Ég þyrfti að fara hinum megin. Ég fór í þá deild en það voru mikil vonbrigði, en safnið var algjörlega tileinkað persónulegu lífi hans en lítið sem ekkert minnst á ævintýrin!O jæja.

En ég þarf að fara að lúlla! :)
Þangað til seinna,

Eva.

Farin að setja rauðbeður á brauðið...

Hæ,hæ.

Seinasta prófið mitt var í gær, í eiturefnavistfræði. Ég held að mér hafi gengið alveg ágætlega. Danirnir eru með öðruvísi kerfi en við þegar kemur að prófum. T.d byrjaði prófið í gær klukkan 9 (um morguninn) en stofunni var lokað korter í níu, svo maður þurfti að vera mættur mjög tímalega. Þetta var skriflegt próf svo við fengum prófarkir, og hver örk var í fjór-riti! Fyrsta blaðið var hvítt (frumrit), og þegar maður skrifaði á það þá afritaðist á fjögur blöð fyrir aftan; eitt gult, eitt rautt og eitt blátt! Maður gat fengið eins mikið af þessum örkum og maður vildi, en ég þurfti að skrifa blaðsíðutöl á arkirnar. Svo þegar ég hafði lokið við prófið þá þurfti ég að stafla saman blöðum eftir lit og setja í sérstakar arkir. Eitt umslag fór til kennarans, annað til prófdómara og ég held það þriðja til skólans, en það fjórða fékk maður sjálfur að eiga og taka með heim! Mér fannst það skrýtið að geta tekið afrit af því sem ég skrifaði í prófinu með mér heim!

Ég naut þess að sofa út í morgun... en það skrýtna var að þegar ég vaknaði fannst mér í smástund ég vera heima á Íslandi! En svo fattaði ég að ég var ekki heima og ég varð fyrir svolitlum vonbrigðum...hehe.

Ég fór niður í bæ í dag til þess að stofna danskan bankareikning. Ég kemst ekki lengur upp með að hafa ekki reikning hérna þar sem að það er mun auðveldara og ódýrara að geta borgað leiguna á netinu og svo er frekar dýrt að taka út pening í hraðbanka af íslenska kortinu. Svo... ég lét verða af því í dag, en það kostar því miður 7.000 ísl.kr að stofna reikning :/

Svo kíkti ég að gamni í Magasin, sem var við hliðina á bankanum, og vá hvað það er allt dýrt þar, ég var fljót að fara út aftur haha. 

Ég var með svaka plön um helgina að vinna í grein og laga skýrslu og undirbúa mig fyrir næstu skólaviku..... en ég er ennþá svo þreytt eftir vikuna að ég held að ég slappi bara af.... ég held að ég eigi það líka skilið :)))

Round two... fight!

Hæ, hæ.

Jæja, þá er ég búin með helminginn af prófunum.. sem sagt eitt af tveimur, hehe.

Var í munnlegu tölfræðiprófi í morgun. Var alveg hrikalega stressuð fyrir það. Munnlega prófið átti sem sagt að fjalla um skýrslu sem ég og tvær aðrar stelpur gerðum, ásamt almennum spurningum út í námsefnið. Það átti að taka 20 min á hvern nemanda auk 10 mínútna þar sem kennarinn og prófdómarinn koma sér saman um einkunn. Fyrst inn var önnur af stelpunum sem skrifaði skýrsluna með okkur. Hún er mjög góð í tölfræði og hefur tekið marga kúrsa í því í heimalandinu sínu. Svo beið ég og beið og svo eftir 45 min (korteri lengur en ætlað var, ég var auðvitað orðin enn stressaðari útaf því)  kom hún svo loks út og beið eftir einkunn. Þegar ég átti að fara inn þá heyrði ég þegar hann tilkynnti einkunnina. Hún fékk 02 í einkunn!!! Ég fékk sjokk. Einkunnaskalinn hérna er frekar skrýtinn, maður getur fengið -03, 00, 02, 4, 7, 10 og 12.  Maður fellur ef maður fær -03 eða 00. En 02 og allt fyrir ofan þýðir að maður hafi náð. Þið getið ímyndað ykkur hvaða áhrif það hafi haft á mig að hún hafi fengið svo lága einkunn og hún átti að heita góð í tölfræði. Mig grunar að það sem hafi orðið henni að (næstum) falli, er að enskan hennar er ekki upp á marga fiska og hún talar mjög hægt, en hún náði allavega.

Svo kom ég inn og þeim (kennaranum og prófdómaranum) fannst merkilegt að ég væri frá Íslandi. Þeir spurðu hvort ég vildi frekar tala á dönsku en ég sagði pent ,,nei, því ég kynni ekki nein tölfræðihugtök á dönsku" (sem var reyndar eins og þið vitið ekki eina ástæða þess að ég vildi ekki að prófið færi fram á dönsku....hehe). Ég var mjög stressuð og þegar ég er stressuð þá tala ég mikið og flissa. Prófdómarinn byrjaði á því að segja að hann hefði haldið matarboð í gær fyrir Íslending sem heitir ,,Gúdlaugúr" og ég sagði strax:,, hahahah do you mean Guðlaugur?" og ég var svo sniðug að segja það svona með þessu kommenti mínu því hann varð pínu pirrípú.  Jæja, svo hélt prófið áfram. Ég var beðin um að segja í stuttu máli frá skýrslunni. Ég gerði það og svo spurðu þeir mig spurninga (mjög erfiðar) og ég svaraði eftir bestu getu. Svo í lokin spurðu þeir hvort ég vildi bæta eitthverju við. Ég spurði þá einnar spurningar, um hvort módelið hefði ef til vill verið betra svona eða svona. Þá svöruðu þeir sitthvorum hlutnum og þeir urðu ósammála sem var frekar vandræðalegt fyrir mig. Þeir fóru þá að ræða um það sín á milli og ég missti einbeitinguna á þeim tímapunkti, kinkaði kolli og hugsaði bara um skútur. En svo sögðu þeir mér að fara afsíðis og bíða á meðan þeir ræddu um einkunnina mína. Svo komu þeir út og sögðu; ,,Your grade is seven". Og ég horfði bara á þá hikandi og spurði hvort það væri gott (ég kann ekki almennilega á þetta einkunnakerfi ennþá). Þá sögðu þeir já og óskuðu mér til hamingju! Ég var samt ennþá eitthvað utan við mig og sagði bara ,,ókei bæ". Gleymdi að taka í hendina á þeim (sýndist þeir báðir horfa á hendina mína og ætluðu að seilast eftir að taka í hendina á mér) en ég strunsaði bara burt hahaha.

Þegar ég kom heim spurði danski meðleigjandinn mig hvað ég hefði fengið í einkunn. Og ég sagði ,,bara sjö :/" og þá sagði hún: ,, vá til hamingju!!" og svaraði bara ,,ó", ég varð hissa.. en ætli ég geti þá ekki bara verið ánægð með sjö hahah. Núna eftir að ég kom heim kíkti ég í ,,student guide" og fyrir einkunnina 7 stendur þetta: For a good perfomance, displaying good command of the relevant material but also some weaknesses", common, þetta var munnlegt tölfræðipróf!!! hahahah :D En með skýrslunni fékk ég lokaeinkunnina 10, sem er næst hæsta einkunninn, úje!!!!

Jæja, þá er það bara næsta próf..... á fimmtudag. Ég nenni ekki að lesa fyrir það.. það er svo mikið efni og mikil efnafræði. O jæja, það kemur bara í ljós hvort ég byrji að lesa í dag hihihi (ég er með svefngalsa).

 

Kv., Eva.

 

Komin aftur til Odense.

Jæja, þá er maður kominn aftur til Odense! Reyndar seinasta mánudag....rosalega er tíminn fljótur að líða!

Ferðalagið hingað gekk vel, ótrúlegt en satt! Engin seinkun og vagninn með sætinu mínu var í lestinni sem ég átti miða með!

Í dag vaknaði ég snemma til að þrífa sameignina og þvo. Svo núna þarf ég að fara að lesa undir próf þar sem ég fer í tvö lokapróf í næstu viku.
Ég á samt alveg hrikalega erfitt með að fá mig til að lesa undir próf...... sjálfsaginn í lágmarki!
Svo í þarnæstu viku byrja nýir kúrsar. Ég hlakka til að sjá hvernig þeir verða.

Það er líka frekar erfitt að einbeita sér við lesturinn þegar dönsku krakkarnir sem búa í ,,blokkinni" minni eru í garðinum fyrir framan herbergisgluggann minn og eru með læti, þau eru að taka þátt í drykkjukeppni... og klukkan er bara tvö að degi til!!! Ég ætla örugglega í skólann á morgun að reyna að læra!

Annars er lítið annað að frétta af mér. Pínu erfitt að þurfa að koma aftur hingað og vera ekki heima... er strax farin að telja niður dagana í jólin!

Bið að heilsa.

Eva.

Komin heim :)

Jæja, þá er maður kominn heim :) Ferðalagið gekk ekki alveg eins vel og ég hafði vonað..... vagninn minn kom ekki sem ég var búin að panta sæti í (í lestinni) svo ég þurfti að standa alla lestarferðina. Svo var fluginu seinkað um 3 tíma og ég lenti í ókyrrð og þrumum og eldingum þegar við áttum að lenda... á Íslandi!!! Ég er rosalega óheillakráka þegar kemur að ferðalögum... haha.

En það er æðislegt að vera komin heim í nokkra daga. Svo gaman að hitta fjölskyldu og vini :) :)

Ég verð samt að skipuleggja dagana vel, þarf að læra ásamt því að reyna að hitta sem flesta og sem oftast :)

Þangað til seinna,

Kv., Eva.

Halløjsa!

Hæ, hæ.

Ferðin í gær til Svendborg var æðisleg!

Við tókum lest frá Odense til Svendborg (um 40 min).
Þá leigðum við hjól (ég var sú eina skynsama með hjálm, með öðrum orðum ég var eini töffarinn!!!!) og hjóluðum til minni eyjar sem heitir ,,Tåsinge".
Það var gaman að hjóla, en brekkurnar voru margar og brattar og það var ekki alveg mín sérgrein að hjóla upp þessar brekkur....

Við skoðuðum kirkju og kastala í Tåsinge. Við fórum upp í kirkjuturninn og virtum fyrir okkur frábæru útsýni, alla leið til Þýskalands.

Svo hjóluðum við til baka til Svendborg. Svendborg er æðislega fallegur hafnarbær! Ég veit ekki hvort að sjávarloftið hafði þau áhrif á mig (sem ég sakna að heiman) en ég varð ástfangin af þessum litla og krúttlega bæ. Svo hljóðlátur og friðsæll, með fallegum litlum litríkum húsum (þó að það hafi verið laugardagur, þegar flestir slappa af, var bærinn extra hljóðlátur). Svendborg er annars þekkt fyrir að vera mikill skipasmíða-bær!

Við fengum okkur svo að borða á hlaðborði í Svendborg. Það var ekta týpískur danskur matur, rauðbeður og flödeskum með öllu..! hehe.

Set inn þrjár myndir með færslunni. (P.s. setti inn fullt af myndum inn á facebook!).

Jæja, nú þarf maður að fara að læra... eða svona einhvern tímann á næstunni helst... hóst. :)

Ééééég get ekki beðið eftir því að koma heim!!!!
Minna en vika þangað til!

Knús, Eva.

Skrár tengdar þessari bloggfærslu:

• sl379275.jpg
• sl379187.jpg
• sl379239.jpg

Panic room!!!!!

Ég er að fara yfir um af stressi.....

Ég var stressuð fyrir vegna verkefnaskila... en ég fékk í dag tvö email sem gerðu útslagið!
Andlegt ástand mitt þessa stundina er það alvarlegt að mér datt í hug að ,,létta á mér" hérna á blogginu... hehe.

Þið munið kannski að ég var að strita við að skrifa greinina um svefnrannsóknina áður en ég fór út, en vegna tímaskorts tókst mér ekki að klára hana. Í dag hafði ritstjóri tímaritsins samband við mig til að rukka mig um greinina....

Seinna emailið var ennþá verra!!!! Það var frá kennaranum í tölfræði sem sagði að í næstu viku verður okkur úthlutað heimapróf sem við þurfum að skila í þarnæstu viku (sem sagt þegar ég er heima á Íslandi!!) sem þýðir að ég verði að vinna í verkefninu meðan ég er heima..........

Auk þess eru skýrsluskil í næstu viku.... tvær stórar skýrsur takk fyrir!!!

Og hvað gerir mín til að takast á við þetta?
Jú.. hún fer í ferðalag á morgun með Erasmus til suður-Fjónar!!!

HA HA ha ha... ha...... sniff.

Edit:
Tölfræðifyrirlesturinn gekk ágætlega...... en það hefði verið ljúft ef stressið hefði ekki haft sín áhrif og alveg viku fyrir fyrirlesturinn.

Hmm....... ég er alltof stressuð vegna þessa skóla miðað við þessa færslu.... er ekki málið baaaaara að slá þessu upp í kæruleysi? :)

Erfiðir dagar framundan...

Hæ!

Það er lítið að frétta... sérstaklega núna þar sem lífið snýst um skólann þessa dagana!

Þessi og næsta vika verða ansi strembnar.... fullt af skilaverkefnum sem þarf að klára áður en ég kem heim (14. okt). Svo held ég fyrirlestur á fimmtudaginn... verð að viðurkenna að ég er frekar stressuð að fara að halda fyrsta fyrirlesturinn á ensku.. en sem betur fer er ég með tveimur öðrum í hóp...! :)

Ég verð örugglega alltaf allan daginn í skólanum næstu dagana og oft langt fram á kvöld! En örvæntið ekki... ég fer að öllum líkindum í ferðalag á laugardaginn með Erasmus til Svendborg (á suður-Fjóni). Svo ég mun vonandi eiga mér eitthvað líf fyrir utan skólann næstu vikurnar!! hehe.

Seinasta helgi fór öll í að ,,tölfræðast".... svo það var ekkert skemmtilegt gert... auk þess var það ,,mín helgi" að þrífa!!! vei!

Danska stelpan (meðleigjandinn) var að segja upp íbúðinni svo ég fæ nýjan meðleigjanda í janúar... krossa fingur að það verði einhver almennileg/ur.

Ég ætlaði að stofna danskan bankareikning um daginn en það kostar 8þús íslenskar að stofna bankareikning og þjónustufulltrúinn var ekki viss hvort ég gæti lagt inn á hann via íslenska heimabankann... svo ég þarf að finna út úr því!!!

Það er búið að vera of heitt fyrir minn smekk seinustu daga.... sérstaklega þegar maður hjólar alla daga í og úr skólanum og maður er sveittur eins og svín eftir það.. :Þ

En ég þarf að fara að lúlla... efast um að ég skrifi eitthvað af viti hérna þangað til næstu helgi eða hérumbil- nema að ég fái innblástur að bloggi í vikunni, t.d. til að segja frá e-u kjánapriki a la Eva hehe.

Hafið það gott!

Kveðja, Eva.

Síðustu dagar... hóst.

Hæ, hæ!!

Vá, ég trúi því ekki hvað það er langt síðan ég bloggaði seinast.. sussu!

En megin ástæða þess er að ég er búin að vera lasin.. með eitthverja fáránlega pest sem gengur í sveiflum... þessi vika var sú versta hingað til, en ég þurfti að fara fyrr heim úr skólanum í gær og ég mætti ekki í fyrirlestra í morgun þar sem ég treysti mér ekki til að hjóla í kuldanum (það var kalt og rakt í morgun). Ég er búin að vera að hósta eins og brjálæðingur í rúma viku....ég held að þetta fari batnandi núna, en ég vona það því ég hef alls ekki tíma til að vera lasin... í næstu viku held ég fyrirlestur og svo þarf ég að skila tveimur stórum skýrslum fyrir október-hlé-ið.

Seinustu helgi fór ég í dýragarðinn hérna í Odense, það var mjög gaman. Ég fór með tveimur stelpum frá Suður-Kóreu og tveimur öðrum stelpum frá Frakklandi. Það fyndna var að ég varð einhverra hluta vegna skipaður leiðsögumaður, en ég var sú eina sem vissi hvernig ætti að fara í dýragarðinn (þrátt fyrir að hafa aldrei farið þangað áður...) og svo leiddi ég hópinn í gegnum dýragarðinn!!!
En ég sá sækýr í fyrsta skipti.. það var áhugavert! Það borgaði sig að vera líffræðinemi, en líffræðinemar við háskólann minn fá ókeypis aðgang :D Dýragarðurinn var bara mjög flottur.

Veðrið er búið að vera æðislegt.. núna er glampandi sól og 20°Chiti... þá er svo týpískt að vera kvefuð!!!

Seinasta mánudag var samkoma í ráðhúsinu þar sem borgarstjórinn í Odense bauð okkur alþjóðlegu stúdentana velkomna. Hann talaði í heilar 2 mínútur og þá var boðið upp á samlokur og fleira. Flestallir mættu bara til að fá ókeypist mat.. heheh (ég þar með talin!).

Seinasta þriðjudag fór ég á ,,Danish movie night" með Erasmus fólkinu. Við horfðum fyrst á Blinkende Lygter (sem ég var reyndar búin að sjá 3var...) og svo fengum við okkur pizzu og töluðum um myndina. Evrópubúarnir (þar með talin ég) hlógum að svarta húmor Dananna... Asíubúarnir fengu hins vegar menningarsjokk! Ég er ekki að grínast, þeim var virkilega brugðið og þau skildu ekkert í neinu. Seinni myndin var svo De grönne slagtere, sem ég var líka búin að sjá áður, og þar sem hún er virkilega ógeðsleg ákvað ég að fara heim (ásamt Asíubúunum haha). Ég varaði fólk við því að hún væri ógeðsleg, og það var mér mjög þakklátt eftir á að hafa fengið þá viðvörun!!!!

Ég ákvað að hætta í dönsku kennslunni og það getur verið að ég fái að taka þátt í talþjálfun með sænsku og norsku fólki. En ég byrja þá eftir hlé-ið í október.

Ég verð ein heima um helgina. En það skiptir litlu máli þar sem að þessi helgi fer mest í lærdóm!!!! Eða ég vona að ég verði dugleg....! Ég er frekar þreytt eftir vikuna, en ég hef sofið mjög lítið vegna hóstakasta á nóttunni seinustu 5 nætur. Ég vona svo innilega að þetta fari fljótlega.. er komin með harðsperrur í augun af því að hósta svona mikið hehehe.

Jæja, ég ætla að drífa mig í Nettó áður en þeir loka.... reyni að vera duglegri að blogga :)
PS. set inn mynd hérna af hjólinu mínu f. áhugasama!!! :)

Eva.

Zzzzzzz....

Halló halló!!

Það er búið að vera mikið að gera... *geisp*!!

Gærdagurinn var laaaaangur! Það voru fyrirlestrar í skólanum frá 10-16 og svo fór ég beint í dönskutíma...
Jébb, ég skráði mig í dönskutíma fyrir lengra komna... þeir er á miðvikudögum frá kl. 17-20:15!!!!
En ég varð fyrir vonbrigðum því það var lögð áhersla á að lesa og skrifa... þannig að mér leiddist frekar mikið mest allan tímann, aðeins of létt... en þegar kom að því að þurfa að lesa upphátt eða tala á dönsku þá voru krakkarnir í hópnum mínum margir betur að vígi en ég!!!! Ég ákvað að hætta, ég græði ekki nógu mikið á þessu því það er svo lítið talað... ætla í staðinn að reyna að finna dönsku-tal-tíma... sé til hvað verður úr því!!

Ég svaf lítið sem ekkert í nótt... var svo heppin að fá þetta hlussubit á ristina! Það bólgnaði upp eins og ég veit ekki hvað og mig klæjar óheyrilega mikið í bitið!!! Eða bitin réttara sagt... :( Annað þeirra er svo stórt að mér er ekkert farið að lítast á þetta...

Annars er eiginlega ekkert að frétta.... ég fékk danska kennitölu í vikunni.....
....ég vaaaar að fara með hjólið mitt í viðgerð (loksins) og fæ það til baka á morgun!

Planið er að fara í dýragarðinn á laugardag og læra..... það er rosalega mikið af verkefnaskilum framundan!!!

Ég er búin að vera með eitthvað leiðindakvef... það getur ekki ákveðið sig hvort það ætli að fara eða verða að eitthverju alvöru... vonum það fyrrnefnda :)

Annars er ég farin að hlakka til að koma heim í október og slappa aðeins af fyrir fyrstu prófatörnina... :)

Kv., Eva.